कर्मचारी को मिलोमतोमा राजस्व चुहावट

वीरगन्ज, २१ असार । पर्साका भन्सार कर्मचारी र व्यवसायीको मिलोमतोमा नदी तथा खोलाजन्य वस्तु निकासीमा राजस्व चुहावट भइरहेको छ ।

प्रज्ञापनपत्र धेरै भन्सार लाग्ने ठूला साइजका ढुङ्गा लुकाई भारत निकासी गर्नाले दैनिक करिब रु. दुइ लाखभन्दा बढी राजस्व  चुहावट हुने गरेको भन्सार स्रोतको दावी छ ।

यस्ता सामान निकासीमा भन्सार चुहावट हुने गरेको जानकारी वीरगन्ज भन्सार कार्यालयलाई भए पनि चुहावट नियन्त्रण तर्फ कुनै ठोस र प्रभावकारी कदम चालिएको छैन ।

 राजस्व चुहावट नियन्त्रण गर्ने जिम्मा पाएका भन्सार कार्यालय, राजस्व गस्ती, प्रहरी प्रशासन र राजस्व अनुसन्धान कार्यालयलगायतका जिम्मेवार निकायसमेत यसबारे मौन छन् ।

 चौध घनमिटरसम्म बोकेका टिपरको ११ घनमिटर र १७ घनमिटर बोकेका ठूलो ट्रकको १२ देखि १३ घनमिटर सामान बोकेको प्रज्ञापन पत्रमा देखाइने गरेको छ । बालुवा र मिस्कट प्रति घनमिटर रु. ९० , साढे दुइ इन्च साइजसम्मका गिटी र ढुङ्गा निकासीमा प्रतिघन मिटर रु. १०० र त्यसभन्दा ठूला साइज निकासीमा रु.३५० भन्सार शुल्क लाग्ने गरेको छ । तर निकासीकर्ताले भन्सार कर्मचारीको मिलोमतोमा प्रति घनमिटर रु.३५० लाग्ने ठूला ढुङ्गा पनि बालुवा र मिस्कटकै दरमा निकासी गर्दै आएको आरोप क्रसर उद्योगीहरूको छ ।

भन्सार तिरेको भन्दा फरक किसिमको गिटी र ढुङ्गा फेला परेपछि राजस्व चुहावट गरेको अभियोगमा भन्सार राजस्व गस्ती टोलीले यही असार १२ गते १० वटा टिपरलाई आवश्यक कानुनी कारबाहीका लागि पक्राउ गरेर भन्सार कार्यालयलाई बुझाएको घटनाले समेत नदी तथा खोलाजन्य वस्तु निकासी गर्दा ठूलो परिमाणमा राजस्व चुहावट भइरहेको पुष्टि हुन्छ ।

साढे पाँच सिएफटी ढुवानी गर्ने क्षमता भएका टिपरमा झन्डै दुइ फीट बढाएर साढे सात सिएफटी गिटी र ढुङ्गा ढुवानी गर्दै आइएको छ । जसले गर्दा सडक विभागले तोकेको मापदण्डविपरीत बढी भार भई सड्क ब्रि्रने गरेका छन् ।

तर उनीहरूले साढे पाँच सिएफटी को भन्सार तिर्ने गरेका छन् । त्यसमा पनि प्रति घनमिटर रु. ३५० लाग्ने ठूला ढुङ्गा पनि बालुवा र मिस्कटकै दरमा निकासी गर्दै आइएको छ ।

पर्साबाट दैनिक डेढ सयभन्दा बढी टिपर र ट्रक यस्ता नदी तथा खोलाजन्य वस्तु निकासी गर्ने कार्यमा संलग्न छन् । कतिपय टिपरहरू त रोडपरमिट, नवीकरण र जाँचपाससमेत नगर्राई गैरकानुनी रूपमा सञ्चालनमा आउने गरेको आरोप व्यवसायीको छ ।

बढ्दै गएको त्यस्ता ट्रक र टिपरका कारण वीरगन्ज रक्सौल सीमा क्षेत्रमा सधैँजसो बाटो अवरुद्ध हुने, दुर्घटनाको सम्भावना अत्यधिक हुने र बढी भारका कारण बाटोको अवस्था नाजुक हुदै जाने भएपछि सिमावर्ती सहर रक्सौलका नागरिक समाज, त्यहाँका भन्सार र स्थानीय प्रहरी प्रशासनको र्सवपक्षीय भेलाले रक्सौलमा बिहान ५ः३० बजेदेखि १० बजेसम्म र बेलुकी ८ः३० देखि १० बजेसम्म दैनिक चार घण्टा गिटी र ढुङ्गा बोकेका त्यस्ता ट्रक र टिपरको ढुवानी गर्ने अनुमति दिएको बताइएको छ ।